Hatreto dia mampilahatra ny tenany amin’ny mpisoloky i Brigitte Razaka nanomboka ny 25 martsa 2023 lasa teo teny amin’ny fitsarana Anosy. Teny miverimberina eo am-bavan’i Lola Rasoamaharo mandrak’androany ny hoe « teneno i Brigitte R., avoahy ny porofo an-taratasim-bola manamarina fa nandoa io vola vidina tany mitentina iray miliara 450 tapitrisa ariary.Tany mirefy 1100 metatra toradroa misoratra ara-dalàna amin’i Lola Rasoamaharo io tany nanorenany trano ao Ivandry, izay nanorenany trano eo ambonin’ny tanin’i Lola Rasoamaharo. Koa mitsipaka marindrano ny fanosoram-potaka sy fanalam-baraka ataon’i Brigitte R. ny tompon’ny tany ara-dalàna, dia i Lola Rasoamaharo izany.
Marihana fa ny fitsarana tao Anosy dia nisokatra malalaka ho an’ i Lola Rasoamaharo, sanatriavina ve sokajiana toy ny mpamono olona na mpanao kidnapping i Lola Rasoamaharo? Adin’ny kanosa aloha hoy ny mpanara-baovao ny fomba nisamborana efa voaomana teny an-dalambe ny alin’ny zoma 24 martsa hifoha ny sabotsy maraina. Zovy no tsy mahalala ny toeram-ponenany eny Ivandry na ny foibe misy ny toeram-piasany amin’ny maha tompon’ny La Gazette de La Grande Ile izay nakaton’ny vadin-tany amin’ny raharaha Jirama koa izy.
Tsy hoe rehefa mametraka fitoriana ny olona iray dia midika fa manana ny fahamarianana ka hahazo ny rariny hatrany, dia i Brigitte R. izany. Toa naman’ny mamato-tena ity ramatoa ity satria dia misoloky ny fananana tsy azy akory, ary mitory tsy misy porofo. Koa takiana hatrany ny hoe “Avoahy ny porofo taratasim-bola fa nandoa vola marina ianao ry Brigitte Razaka…. ”, hoy i Lola Rasoamaharo. Misy ny fitenenana manao hoe “ny vato raha nahitana soa dia hosora-menaka”. Samià manao kibo mitsara tena e!.
