Herin-taona sy efa-bolana aty aoriana vao nivoaka ny didim-pitsarana momba ny fihampangana an-dRaissa Razaivola. Ny alakamisy 4 may 2023 teo tetsy amin’ny fitsarana Anosy, dia ny fanasaziana hiasa an-terivozona fito taona. Ny fihampangana dia ny fikasana fifofoana ain’ olona ny 29 janoary 2022 teny Anosivavaka Ambohimanarina. Teo koa ny famoahana horonam-peo tanaty tamban-jotra sosialy. Voarakitra tamin’izany ny resaka fanondranana volamena an-tsokosoko nahitana teratany karana, ary izay nahavoatonona anaran’olona ambony amin’ny Andrimpanjakana izay, dia ny minisitra teo aloha Imbiky Herilaza, ny tonian’ny Fampanoavana Ranary Rakotonavalona …. ho mpiray tsikombakomba nifandray an-tariby tamin’ny voampanga io. Ary tamin’ io fitsarana io ihany, dia nampiaka –peo i Raissa R. teo ivelan’ny fitsarana momba ireo mpanondrana volamena an-tsokosoko niteny hoe “ ..ianareo miaro ireo “trafiquant” ireo. Nambarany fa navoaka daholo ny traffiquant ary mazava izao hoy hatrany izy. Noterena koa aho; hoy izy ny hanao démenti hilaza ny zavatra tsy nataoko”. Nilaza izy fa tsy hanonona ny anaran’ity farany na inona hidona na inona hihatra. Tsy nihambahamba koa izy namoaka ny hoe “ avereno ny volako, avereno ny volako 400 tapitra … ry PG sy ny SG n’ny fitsarana..” .
Antsojay no mihatra hoy ny mpisolovava an-dRaissa Razaivola rehefa tsy nanaiky ny fanerena azy ny olona arovanay. Mandringa koa ny fizotran’ny fitsarana satria na ny vavolombelona miisa telo sy ny mpitory efa nisintona ny fitoriana aza tsy tonga niatrika hoy hatrany ity mpisolovava ity. Tsy midika izany fa manome rariny an-dRaissa R. Saingy rehefa nahavanon-keloka dia mendrika ny fampiharana ny sazy avokoa, tsy atao misy ny tombo sy hala.
