Delestazy ao Mahajanga: Amin’ny fifidianana no hifankahita

Tena tsy faly amin’i Andry Nirina Rajoelina ny vahoaka maro ao Mahajanga ao. Ny herinandro lasa teo iny izay nanaovana ny fanompoambe izay fanaon’ny Sakalava ao Boeny amin’ny Fitampoha momba ny fampandroana an’Andriamisara efa-dahy. Vahoaka aman’alina no tonga mamonjy izany isan-taona avy amin’ny lafivalon’ny Nosy. Misy hatramin’ny Vazaha sy Kaomoro anina koa tonga manatrika izany.
Nandritra ny fotoana izay nipetrahana tany tao anatin’ny herinandro dia tapaka matetika ny jiron’ny Jirama. Maharitra hatrany amin’ny adiny dimy izany fahatapahana izany raha kely indrindra. Ao anatin’ny iray andro nefa dia tapaka in-telo raha kely indrindra ny jiron’ny Jirama. Tena tsy faly ny olona ary dia mamoaka teny sady mivoaka ny trano izy ireo fa amin’ny fifidianana mifankahita amin’i Rajoelina. Potika ny fihariana rehetra any an-toerana noho izany. Mirongatra izay tsy izy ny halatra sy ny vakitrano ary ny vono olona. Tsy azo itsangatsanganana hariva intsony any amin’ny moron-dranomasina.