Seraseran’ny mpitondra fanjakana : Ihomehezana sisa

Miha-maivan-danja isan’andro hatrany ny serasera avoakan’izao fitondram-panjakana hifarana afaka 36 andro androany izao, na ny serasera anatiny na ny ivelany. Dia ihomehezana sisa, hoy ny mpanara-baovao maro, ny hevitra nasongadina tamin’ny tatitry ny filan-kevitry ny minisitra tamin’ny alarobia 02 aogositra 2023. Lany fampitam-baovao tokoa ka ny foto-dian’ny filohampirenena lasa niatrika ny fivoriana ao Rwanda no nanombohana ny PARAGRAPHE ? voalohany sy natao sora-mainty matavy (gras) miavaka mihitsy. Maro ireo teny nisolifatra noho ny tsy fahakingan’ny saina ka ny kajy tany amin’ny kilasy ambany aza dia nodisoin’ny filohampirenena. Tsy ny filohampirenena ihany no voakasik’ izany fa na ny tompon’andraikitra sasany anatin’ny Andrimpanjakana, dia lasa fihomehezana avokoa . Ny vaovao nandrasan’ny maro dia ny filazana avy amin’ny seraseran’ny fitondram-panjakana tamin’io tatitra nivoaka io, ny amin’ny fahataperan’ny delestazy lavareny izay mampikolay ny vahoaka. Efa tapitra ilay telo herinandro, fetr’andro nampanantenain’ny filohampirenena ny vahoaka malagasy, sa dia lasa hiandry 5 taona indray ny vahoaka malagasy. Tsiahivina etoana koa ny sosialim-bahoaka, anisan’izany ny fanamorana ny vidim-piainana mbola midangana. Ny fanamboarana-dalana, asa na miandry fampielezan-kevitra koa vao hanomboka ny asa ? Tsy aleo ve mba mangina fa efa halam-bahoaka ê !