Skip to content
Le Journal de l'île Rouge
Divers

En cette période électorale , la destruction des forêts s’intensifie : AVG, TAFO MIHAHAVO ET ROHY alertent l’opinion publique

La gazette de la grande île
24/08/20233 minute read

FANAMBARANA

Misy ankehitriny ireo manao fandripahana ala tsy ara-dalàna any amin’ny Faritra Analanjirofo sy Alaotra Mangoro. Nisy ny fidinana ifotony nataon’ny TAFOMIHAAVO Nasionaly sy TAFOMIHAAVO Faritra niarahana tamin’ny vadintany sy ireo solon-tenan’ny DREDD Alaotra Mangoro sy DREDD Analanjirofo ary ireo mpitandron’ny filaminana tany amin’ny Distrikan’ny Soanierana Ivongo Maherivaratra hanamarinana izany fandripahana ala tsy ara-dalàna izany ka hita tany tokoa ireo hazo voatapaka toy ny hazo Ala sy hazo Voamboana tratra tamin’izany.

Vokatr’ireo tranga nisy ireo dia nandefa fitoriana tany amin’ny Fitsarana Ambaratonga Voalohany Ambatondrazaka ny TAFOMIHAAVO, hatreto anefa dia mbola tsy misy tohiny izany raharaha izany.

Nandeha tany amin’ny Kaominina Didy, Distrika Ambatondrazaka indray ny TAFOMIHAAVO Nasionaly sy Alaotra Mangoro nanao fisafoana ala tampoka niaraka tamin’ireo VOI any an-toerana ka nahatra ihany koa olona mipetraka sady efa mivarotra enta-madinika anaty ala arovana ary nahitana Hazo sarobidy efa voatapaka. Nahatratra hazo ala 1 (Iray) traktera tamin’ny làlana Didy Ambatondrazaka ary nampandrenesina ny DREDD Alaotra Mangoro sy ny MEDD Foibe ary nisambotra ireo olona nitondra ny hazo niaraka tamin’ny mpitandron’ny filaminana Ambatondrazaka.

Efa nalefan’ny DREDD Alaotra Mangoro eny anivon’ny Fitsarana Ambaratonga voalohany Ambatondrazaka ihany koa io raharaha io.

Misy ankehitriny ireo fanelanelanana hamotsorana ireo hazo tratra sy ireo olona nanao ny heloka ireo izay efa fomba fanaon’ny tambazotran’ny mpitrandraka ala tsy ara-dalàna any amin’iny faritra iny. Mandeha ihany koa ny feo fa tsy maintsy tafavoaka ireo hazo sy ireo olona nanao heloka amin’ny alalan’ny fanomezana vola ireo tompon’andraikitra samihafa.

Koa manoloana izany dia manao antso avo aminareo tompon’andraikitra ara-panjakana mahefa sy voakasika ity raharaha ity izahay firaisamonimpirenena tarihan’ny hetsika ROHY amin’ny alalan’ny vaomieran’ny tontolo iainana : TAFOMIHAAVO sy Alliance Voahary Gasy miaraka amin’ireo mpikambana rehetra ato amin’ny ROHY sy ireo firaisamonimpirenena hafa ny hitsarana araka ny Lalàna fandripahana ala tsy ara-dalàna sy ny fangalarana ny harem-pirenena an’ireo voarohirohy nanaovan’ny TAFOMIHAAVO sy ny DREDD Alaotra Mangoro ny fitoriana ao amin’ny Fitsarana Ambaratonga Voalohany ao Ambatondrazaka.

Marihina fa tranga iray mila arahimaso akaiky io fa araka ny fahatsapanay dia manomboka mirongatra indray ny fandripahana ny harena voajanahary eto Madagasikara manoloana ny fifidianana ho avy. Manamafy izany ireto ohatra vitsy manaraka ireto :

Teratany Israeliana tratra teny Ivato saika hanondrana 59 sokatra any Thailand, nahazo sazy 2 taona antranomaizina, efa eny Tsiafahy amin’izao fotoana izao (Jona)

Trafikana sokatra (73 dia avy eo 41) tratra tao Toleary vokatry ny fiaraha miasa AVG, TSA, SEG sy MEDD. Efa eo ampelantanan’ny Fitsaràna ao Toleary ny raharaha (Jolay)

Fanohizana fandripahana ala voajanahary ao Beparasy Moramanga sy Vohibola Pangalanes ka handrahonana ny mpiaro indray. Efa eo ampelantanan’ny Fitsaràna ao Ambatolampy sy Toamasina ny raharaha (Jolay)

Pakistanais roa sy Malagasy iray tratran’ny zandary saika hanondrana zavamaniry sarobidy amanjatony mitentina iray tapitrisa dolara (Aogositra)

Ramatoa iray tratran’ny AVG sy ny DULCC (MEDD) ary ny BIANCO ambodiomby saika hamoaka hazo sarobidy amina kubota maro tao Morarano Gara, sady mandrahona no milaza mahafantatra olona ambony. Efa eo ampelantanan’ny Fitsaràna ao Moramanga ny raharaha (Aogositra)

Sokatra 111 tratehaka saika hahondrana ao Mahajanga amin’izao fotoana izao (Aogositra).

Arahinay firaisamonimpirenena maso akaiky na ny zotrampitsaràna na ny zotrampamaizana ireo raharaha ireo.

AOKA TSY HATAO VAROBOBA SY TANTELY AFADRAKOTRA AMIN’NY RESAKA POLITIKA MALOTO NY HARENA VOAJANAHARY MALAGASY!

Natao teto Antananarivo, androany faha 23 Aogositra 2023

Partager cette article
Articles connexes
Back To Top