1er May 2024 : Feno mpitandro ny filaminana teo amin’ny kianjan’ ny 13 may

Fa misy inona marina no ao amin’ny kianjan’ny 13 may etsy Analakely no dia ambenana mafy tsy misy toa izany? Any amin’ny 67ha no milahatra ny sendikan’ny mpiasa eto Antananarivo, ka Analakely no fenoina Emmo/reg. Tsy vitan’izany fa mbola itondrana fiarabe mitondra basy marovana ireny koa.
Tena ambenin’ny fitondrana Rajoelina izay tsy izy ity toerana ity. Misy fanafody milevina ve ao sa efa fahakanosà fotsiny izao? Hatramin’ny nijoroan’ny fitondrana Rajoelina dia tsy misy atahorany mafy raha tsy ny fidiran’ny mpanao fihetsiketsehana eo amin’ity toerana ity. Maro no resaka mandeha amin’ny kianjan’ny 13 May ity satria teo no fiandohan’ny fanonganam-panjakana rehetra teto Madagasikara.
Mahakasika ny fanehoan-kevitra nataon’ ireo sendikan’ny mpiasa teto Antananarivo dia azo lazaina hoe reraka dia reraka ny mpiasa malagasy. Tsy nahasarika olona intsony ny fankalazana ny andron’ny 1er May ity. Toa kabary fotsiny sy filaharana no sisa. Nangingina eran’i Madagasikara tamin’ny fankalazana ny fetin’ny asa ity. Azo lazaina fa malemy tanteraka ny sendikà n’ny mpiasa malagasy.