Teti-bolam-panjakana taona ho an’ny 2025
Holanian’ny depiote tsy misy taolany
Nahena izay tsy izy ny teti-bolam-panjakana 2025 na ny LFI raha nampitahana tamin’ny tetibola nolanian’izy ireo tamin’ny taona 2024.
Raha fintinina ny ao anatiny dia atrany amin’ny 62% sisa ny fandaniana sy ny vola hanatanterahana ny asa rehetra ho amin’ny fitantanan-draharaham-panjakana sy ny fandrosoanan’ny firenena. Mbola tsy nisy toa izao tao anatin’ny taona maro teto Madagasikara satria na tamin’ny andron’ny faha-mpanjaka sy ny fanjanahantany aza dia nitombo hatrany ny teti-bolam-panjakana mpanjakana io isan-taona fa tsy nihena toy izao . Fa dia naninona loatra ny fitondran-dRajoelina no nikorosofahana toa izao?
Tsy hisy fandrosoana azo antenaina izany amin’ny taona 2025 sy ny manaraka eo raha ny zavatra misy amin’ny teti-bolam-panjakana 2025 ity no jerena. Resaka adala sisa ilay filazana fa “Madagasikara tsy maintsy mandroso”.
Tsy maintsy lany anefa io teti-bolam-panjakana io na dia hita fa tsy hitondra soa hoan’ny firenena aza moa tsy arak’ilay fitenena hoe « mihena an-toerana toa ny fen’antitra ».
Ny vola hividianana fiara 4×4 ho an’ny depiote no hany miavaka ao: midika izany fa ho lany tsy misy taolany ity LFI hampahantra vahoaka ity. Na inona na inona fomba fijery dia hampahantra vahoaka io ary tsy hitondra soa hoan’ny firenena. Na inona koa resaka hataon’ny olom-pirenena manakiana io dia tsy maintsy lanin’ny depiote io. Dia samy hahita azy eo isika ny faha 29 Novambra 2024 fa lany tsy misy fanitsiana io.
Fitsarana sy ady amin’ny kolikoly
Mbola ilaina ve ny Fitsarana avo na ny HCJ?
Ny taona 2018 no natsangana ny Hcj na ny « haute cour de justice » na koa ny fitsarana avo. Hiady amin’ny kolikoly avo lenta eto amin’ny firenena izy io no nananganana azy. Ny filohan’ny repoblika, ny filohan’ny andrim-panjakana, ny minisitra sy ny mpiasam-panjakana ambony no tena nananganana azy ka hitsara endrika ‘kolikoly avolenta nayaln’ izy ireo teo amin’ny fitondrana.
Hatramin’ny taona 2018 ka hatramin’ny taona 2024 ity dia tsy niasa mihitsy io andrim-panjakana iray io fa napetraka fotsiny hihinam-bolam-bahoaka. Sakana amin’izany ny lalana momba azy io satria dia tsy afaka mitsara sy manao famotorana ny mpitsara voatendry amin’izany raha tsy mahazo alalana avy amin’ny antenimieram-pirenena. Ny depiote no mpitsara ambonin’ny mpitsara ao amin’ny Hcj ity. Tsy misy zavatra mandeha fa mihantona ao Tsimbazaza ao ny fitoriana ireo olona ambony ireo. Nisy mihitsy aza ny depiote nanankarena tampoka tamin’ity raharaha ity teo aloha satria nanakana ny fitsarana ireo olona ambony ireo. Tena resaka kolikoly koa izany raha atao ny fanadihadiana.
Amin’ny alatsinainy faha 1 desambra 2024 irao dia hifidy ny solotenany ho ao amin’ny Hcj indray ny depiote.
Mbola ilaina ve ity andrim-panjakana Hcj ity na dia tsy afaka miasa fa mandany volam-bahoaka fotsiny ihany hatramin’izao.
