Fifidianana ben’ny tanàna
Sady tsy nahasarika olona no feno ady sy hosoka
Tamin’ity fifidianana ben’ny tanàna ity no nahitana ady sy kolikoly ary korontana betsaka indrindra hatramin’izay nanaovana izany. Hita tao amin’izany : ny fanakaramana olona hifidy, ny fanaovana biletà efa vita mialoha, na ihany koa fanomezan-dalana olona tsy ara-dalàna hifidy…
Ity fifidianana ity koa no nahitana depiote niady teny amin’ny toerana misy ny fifidianana nohon’ny hosoka hita mibaribary ataon’ny antokon’ny mpitondra toa ny nitranga tany Mahajanga ka nahatonga ny fisamborana ny depiote Afakandro any amin’ny mpitandro ny filaminana.
Ity fifidianana ity ihany koa no nahitana mpifidy kely indrindra tany amin’ny birao fandatsaham-bato satria dia nisy hatrany amin’ny 7 % monja ny olona tonga nifidy.
Azo lazaina fa ity no fifidianana ratsy indrindra hatramin’ny taona 1960 nahazoan’ny firenena ny fahaleovantena. Tezitra ny vahoaka, leo ny zava-misy ankehitriny.
Andry Rajoelina
Lany andro tamin’ny fifidianana ka tsy nandeha ny fampandrosoana
Ity volana desambra ity no mitsingerina ny taona nitondran’i Andry Rajoelina an’i Madagasikara indray mandritry ny dimy taona vaovao . Asa fampandrosoana ny firenena araka ny voalazany no ho tanterahana amin’izany ka ny voalohany dia ny ady amin’ny fahantrana. Manaraka azy dia ny fanatsarana ny maha olona ka izany rehetra izany dia hatao ao anatin’ny dimy taona. Izany no voalazan’ny filoham-pirenena Andry Rajoelina izay nofintininy amin’ny teny hoe « Madagasikara tsy maintsy mandroso «
Dia lasa resaka mampihomehy io tarigetra io satria tao anatin’ny iray taona izay dia nitombo ny fahantrana teto Madagasikara. Potika ny fihariana isan-karazany, mitotongana andro aman’alina ny farim-piainan’ny vahoaka malagasy. Mandry tsy lavo loha ny malagasy fa indrindra ireo tantsaha any ambanivohitra noho ny tsy fandriampahalemana izay mirongatra mafy.
Ny fifidianana ben’ny tanana sy ny depiote no nahamaika ny fitondram-panjakana ankehitriny. Ny fifidianana no azo lazaina fa zavabita tao anatin’izay iray taona izay. Tsy azo antoka ny hahitana fampandrosoana izany na dia kely aza.
Eo anatrehan’izany rehetra izany dia kivy tanteraka amin’ny politikan’ny fitondrana ankehitriny ny vahoaka. Be dia be ny olona marary anatiny sy malahelo am-po. Toa ny valala voatango tongotra aman-tanana izy ireny ka tsy afa-mihetsika.
