Jeneraly Ravalomanana Richard
Nisolo an’i Lalatiana Rakotondrazafy sy Mox Ramandimbilahatra tao amin’ny TIM
Ny filohan’ny antenimieran-doholona, ny jeneraly Richard Ravalomanana indray izao no nisolo ny mpanao gazety sady minisitrin’ny serasera teo aloha Lalatiana Rakotondrazafy izay « mpitatasy ».
Mamaly, mandrahona, mandrangaranga ny fahefam-panjakana sy mitanisa ny lalàna eto amin’ny firenena raha vao misy olona maneho hevitra ka mitsikera ny zavatra tsy mety ataon’ny fitondrana amin’izao fotoana izao. Atao biby fampitahorana ny mpitandro filaminana izay lazaina fa miaro ny vahoaka sy ny fananany ary miaro ny andrim-panjakana. Tsy misy mandà izany ny olona fa saingy miendrika fandrahonana sy fampitahorana hoan’ny vahoaka ny fiteniny. Tena tsy misy demokrasia intsony eto Madagasikara noho izany.
Tsy misy hafa amin’ny zavatra nataon’i Mox Ramandimbilahatra tamin’ny fiarovany an’i Ravalomanana Marc sy ny antoko TIM tamin’ny taona 2001-2002 ka hatramin’ny 2009 ireny no fahitana ny zavatra ataon’ny filohan’ny antenimieran-doholona amin’izao fotoana izao. Tsy maintsy miseho tele isan-kerinandro izy raha kely indrindra ary miresaka mamaly izay olona manohitra fanjakana. Izany ve no asan’ny filohan’ny antenimieran-doholona?
Ny azo ambara dia miaina ao anatin’ny fahantrana sy ny fahasahiranana tanteraka ny malagasy ankehitriny. Tsy mahita vaha olana amin’izany ny fitondrana ka dia io manao didy kofehy lehibe io. Taratry ny tsy fandehanan’ny raharaham-pirenena io ataon’ny Jeneraly Richard Ravalomanana filohan’ny antenimieran-doholona io.
Ny tantara tsy mba fanadino. Mahaiza maka lesona.
Place du 13 mai Analakely
Ambenina toa ny lapam-panjakana eny Iavoloha sy Ambohitsorohitra
Tao anatin’ny herinandro vitsy izay tao anatin’ny faran’ny taona 2024 sy ny voalohan’ny volana janoary 2025 ity dia tsy tapaka miaramila sy zandary ary polisy avy amin’ny Emo/nat eo amin’ny place du 13 mai ao Analakely ao.
Tsy misy olona migrevy, tsy misy olona mieritreritra fanongam-panjakana, tsy ahitana olona mpanohitra mihevitra ny hanao fihetsiketsehana. Ny zava-misy dia Ravalomanana Marc sy ry Paraina Auguste ary ny sendikan’ny Randrana sendikaly sy ireo vondron’ny mpanabe no milaza ny heviny fa mijaly ny vahoaka sy potika ny fampianarana eto Madagasikara.
Avy hatrany dia miaramila sy zandary ary polisy no atao mameno ny kianja. Tsy izany ihany fa fenoina mpitandro filaminana koa ny tanana maro eto Antananarivo. Ambenana toa misy olona hanafika ireny. Hatramin’ny fisian’ny delestazy tsy misy fiafarany izay dia ampihorohoroana amin’ny zandary sy ny polisy ary ny miaramila ny toerana maro eto an-drenivohitra.
Raha toa ka natanjaka ny fitondrana io dia tsy nisy ny toa izao fa marikin’ny tsy fandehanan’ny raharaham-pirenena izao. Sao dia misy vaha olana hafa tokony horaisin’ny fanjakana ankoatran’ny fampiasana miaramila toa izao?
