Madagasikara
Fijaliana vaovao isan’andro no iainan’ny vahoaka
95 % ny malagasy no mahantra sy miaina anatin’ny fahasarotana tanteraka amin’izao fotoana izao. Ireo mpitondra fanjakana sy olona vitsy sisa no misitraka ny harena voajanahary sy ny fitantanana eto Madagasikara.
Olom-boafidy izay ahitana ny filohan’ny repoblika, ny minisitra sy ny tale jeneraly ary ny sekretera jeneraly, ny depiote sy ny ben’ny tanana no azo lazaina fa tsy mitaraina amin’ny fahantrana eto Madagasikara ankehitriny. Miampy ireo ny miaramila jeneraly mitana andraikitra ambony sy ny mpandraharaha ara-toekarena izay mifehy ny harena marobe. Zara raha 2 % ny vahoaka malagasy ireo.
Ankoatra ny fijaliana ara-politika sy ara-pitantanana dia zava-doza koa ny ateraky ny toetr’andro. Avy maina tsy ahitana orana manditra ny volana fahavaratra , dia ranobe sy oram-batravatra indray no valin’izany ka potika daholo ny fambolena sy lalana manerana ny nosy. Fijaliana miampy fijaliana no iainan’ny vahoaka malagasy ankehitriny. Tsy fandriampahalemana, haintany, tondra-drano, fahasimban-dalana… Toa nilazan’Andriamanitra indray koa aza.
Fiainam-pirenena
Tsy nahomby ny politikan’ny vidim-bary nafarana 750 ariary
Mba hampidinana ny vidim-bary ho azon’ny malagasy rehetra vidina dia nanafatra vary indray ny fanjakana malagasy. Hamidy amin’ny vidiny 750 ariary ny kapoaka izy io araka ny nambara andro vitsy lasa izay. Ho saziana izay mpivarotra mivarotra mihoatra izany eto Madagasikara. Indrisy anefa fa tsy hita eny amin’ ny tsena izy ireo vary ireo fa ny vary izay vidina amin’ny 1 100 ariary sy 1 200 ariary no mbola mameno ny tsena maro manerana an’Antananarivo.
Any amin’ny faritra moa dia mbola tsy ahitana ireo vary izay amidy amin’ny 750 ariary ireo fa mbola ny vary zanatany ihany no misy any. Misy ny mivarotra toa ny voalaza eo ambony io ny vidin’ny vary zanatany ireo dia 1100 ariary ny kapoaka. Ireo efa mikabary indray dia 900 ariary ny vary vao.
Hatao inona izany ireo vary nafarana ireo satria sady tsy hita eny an-tsena no tsy maha voavaha ny olana ara-bary fa toa hamonoana antoka ny firenena indray ny fanafarana azy.
Raha tsy lafo ireo dia ho zaraina hatao tosika fameno na ho dorana indray satria ho simba indray toa ny vary nisy teo aloha tany Toamasina sy Mahajanga ireny.
Tsy voavahan’ny fitondrana Andry Rajoelina mihitsy ity fidangan’ny vidim-piainana ity. Tsy mahomby ny politikany. Tokony handinin-tena ny fitondrana.
