Samifin : Faly mitanisa ny famotsiambola sy ny hosoka ataon’ny tsy maty manota fotsiny

Tena mazava ny fanazavana nataon’ny tale jeneralin’ny Samifin na ny birao miady amin’ny famotsiambola sy ny asa fampihorohoroana tamin’ity herinandro ity izay milaza fa 2000 miliara ariary no vola maloto nataon’ireo sokajin’olona roa voalaza eo ambony ireo nanomboka ny taona 2020 ka hatramin’ny taona 2024 teo iny. Volabe izay efa voaporofo’izy ireo izany ary ananany antontan-taratasy mazava. Ny Samifin koa manana fahaizana manokana amin’izany. Hita ny taratasy sy ny porofo momba ireo olona mangalatra sy manao kolikoly eto amin’ny firenena ireo saingy tsy azo mihitsy ireo olona ireo fa toa ny lolo na ny matoatoa fotsiny ihany. Tena mahagaga sy mahavalalanina.
Isan’ny miady amin’ny kolikoly koa ny Samifin ity satria dia mifanindran-dàlana amin’ny Bianco na ny birao mahaleo tena – miady amin’ny kolikoly izy ity.
Hatramin’ny nisiany izay efa ho folo taona mahery izao dia faly mitanisa ny famotsiambola sy ny kolikoly avolenta eto amin’ ny firenena fotsiny fa tsy mahazo olona sy tsy misambotra olona amin’izany.
Dia manao valandresaka hoan’ny mpanao gazety isan-taona mahakasika ny filazana ny vola voahodinkodina amin’izany amin’ny famotsiambola ity saingy tsy misy dikany satria tsy misambotra ireo olona lazainy fa manao ity raharaha ity.
Resaka hetra, harena ankibon’ ny tany, hazo sarobidy miondrana antsokosoko any ivelany. Volabe ange izany ary afaka ampandrosoana ny firenena mihitsy, nefa dia lazaina fa tsy hita ny olona manao izany. Samy hitan’ny Samifin avokoa ireo ary azony ny tetimbidin’ny hosoka sy ny kolikoly ary ny halatra amin’izany fa dia mijanona eo amin’ny fitanisana izany ihany ny raharaha.
Mbola ilaina ve ny Samifin eto Madagasikara? Sao dia vesatra hoan’ny fanjakana sy ny vahoaka fotsiny ny fisiany satria tsy ahitam-bokany satria volam-bahoaka be dia be no andoavana ny karaman’izy ireo sy ny iasany amin’izany.