Famonoana an’i Rasazy Narindra: Mpitandro ny filaminana am-polony maro no mitady ireo mpamono azy

Tamin’ny alakamisy 20 Febroary 2025 teo no novonoiny tsy mataho-tody tao Ambavalozakely ao amin’ny kaominina Itremo any Ambatofinandrahana ny ben’ny tanana Rasazy Narindra ao Mangataboahangy. Avy nametrahana ny samboady tao Amboditra izy ny alarobia ka nihazo ny lalana mody izao ka fanafihana azy teny an-dalana ka nahafaty azy. Olona dimy lahy nirongo basy no nanakana ny fiara nitondra azy ary namono azy.
Azo lazaina fa tena ity Rasazy Narindra ity no tena nokendrena tamin’izany fa tsy tia ny fanafihana ataon’ny dahalo matetika amin’iny lalana RN 35 iny . Rehefa voatifitra izy dia nitsoaka ireo mpamono azy ka tsy naka na inona na inona tamin’ny fiara nitondra azy nefa dia toerana kizo tsy misy tanana sy olona mandeha mihitsy ilay toerana fa tanety be fotsiny sy toerana mangina mandritra ny km maro .
Marobe ny resaka mandeha amin’ity raharaha ity. Ny azo antoka dia tena ity Rasazy Narindra ity no natao izay hahafaty azy. Tsy azo sokajiana ho asan-dahalo izany fa azo antoka fa famonoan’olona fotsiny izao izay efa voaomana.
Jeneraly vitsivitsy sy kolonely maromaro ary mpitandro ny filaminana am-polony maro no tonga any Ambatofinandrahana amin’izao fotoana izao. Efa misy ny olona voasambotra telo ka isan’izany ny PDS ny kaominina Mangataboahangy izay isan’ireo kandidà nifaninana taminy tamin’ny fifidianana ben’ny tanana teo iny ka tsy lany. Olona roa avy ao Ambatofinandrahanafa ny roa lahy ary heno koa izao fa efa misy olona hafa voasambotra koa.
Raharaha politika sy resaka vato no vinavinan’ny mpanara-baovao ny antony namonoana an’i ben’ny tanàna ao Mangataboahangy izao. Marihina fa ny rainy dia efa ben’ny tanàna tao amin’ity kaominina ity tao anatin’ny efatra mandà ary maty novonoin’olona olona koa.
Andrasan’ny maro ny vokatry ny fikarohana ataon’ny mpitandro filaminana amin’ity raharaha ity izay be mpanaraka mihitsy amin’izao fotoana izao.