Avelao ny marina hiteny. Avelao ny fahamarinana hanavotra ny firenena.

Tsy azo ekena intsony ny kolikoly sy ny fanimbazimbana ataon’ireo mpitondra!

GenZ, mijoro ho an’ny fanovana marina!

Amin’izao fotoana sarotra lalovan’i Madagasikara izao, dia mbola mitohy tsy an-kijanona ny fiverenan’ny olon-kolikoly eo amin’ny fitondrana haloan’ny vahoaka.

Eo am-pijoroana ho mpitondra fanjakana, ireo olona efa voasaringotra tamin’ny raharaha maizina, dia mbola averina amin’ny andraikitra ambony — tahaka ny hoe tsy nisy na inona na inona nitranga.

Tranga mivaingana iray: Jean André Ndremanjary

• Filohan’ny Antenimieran-doholona vonjimaika
• Mpikambana tao amin’ny antoko politika Arema
• Minisitra teo aloha misahana ny Fanatanjahantena.

Voalaza fa nandritra ny fotoam-piasany tamin’ny maha-minisitra azy, dia nisy fanodinkodinam-bola goavana nitranga tao amin’ny ministera. Raha ny loharanom-baovao manakaiky ny raharaha no itokisana, i Ramalanjaona Fils, Sekretera Jeneralin’ny Minisiteran’ny Fanatanjahantena, no nahita sy naharihary ny marina momba izany kolikoly izany.

Tsy ela taorian’izay, maty noho ny antony mampiahiahy ity SG ity. Misy mino fa tsy kisendrasendra ny nahafatesany, fa vokatry ny fahalalàny ny zava-miafina ao amin’ny ministera.

Tsy azo ekena intsony izany!

Tsy azo ekena intsony ny fampanginana ny marina. Tsy azo ekena ny famerenana ireo olona efa voaloto tamin’ny kolikoly sy zava-mampiahiahy amin’ny fitantanana ny firenena. Misy olona miezaka mamono sy manampina maso amin’ny rariny, ary izany dia manohintohina mivantana ny hoavin’ny firenena.

GenZ mijoro: ho an’ny mangarahara sy ny fahamarinana

Ny tanora, ny taranaka vaovao, dia tsy hanaiky intsony ny fahanginana sy ny fankatoavana jamba. Mila fanovana isika. Mila fitondrana madio sy mangarahara. Mila fitsarana marina, tsy mitanila. Mila fanavotana ara-moraly ho an’i Madagasikara.

Avelao ny marina hiteny. Avelao ny fahamarinana hanavotra ny firenena.