Famotsiam-bola DG Bianco, DG SAMIFIN

Firaisana tsikombakomba sa tsy fahaiza-manao? Mampametra-panontaniana ny zava-misy eto Madagasikara manoloana ny raharaha Mamy Ravatomanga. Mpiray tsikombakomba amin’ity famotsiam-bola amina miliara dolara ity ve ny Dg an’ny Bianco sy ny SAMIFIN sa tsy fahaiza-manao ka tsy nahitan’izy ireo izao raharaha maloto izao?
Sarotra ihany anefa ny hiteny fa tsy fahaiza-manao satria na ny fanendrena azy ireo teo amin’izany andraikitra izany aza dia hinoana fa tsy maintsy nisy fankatoavan’i Mamy Ravatomanga.
Noho izany, tokony hanokafana fanadihadiana ny Dg Bianco sy ny SAMIFIN satria tsy mazava mihitsy ny toerana misy azy ireo manoloana izao raharaha izao.
Raha vao nipaoaka ny afera tatsy Maorisy dia efa tokony nanokatra fanadihadiana avy hatrany tamin’ireo banky nandefa ireo miliara dolara ireo tany Maorisy ny Bianco sy ny SAMIFIN.
Mazava ho azy fa tokony hanokafana fanadihadiana avokoa izay banky nandefa ireo vola ireo tany Maorisy, miampy ny PCA sy ny PDG an’ireo banky ireo.
Hatreto aloha dia fantatra fa tsy afaka miala amin’izany ny PM Herintsalama Rajaonarivelo koa izay indrindra no mahatonga ny maro miahiahy amin’izao fotoana. Hamato-tena amin’ity raharaha maloto ity tokoa ve ny praiminisitra lehiben’ny governemanta?