Fanjakana Fanavaozana : Variana amin’ny adin’akoholahy

Nangina tsy henoheno intsony ilay filamatra tany amboalohany hoe hanova rafitra izay nimatimatesan’ny zandry GenZ izay nitarika ny tolona teny an-dalambe sy teny an-kianja.
Toa niverina amin’ny zava-nisy teo aloha indray ny raharam-pirenena ankehitriny. Niova toerana fotsiny ireo forongony izay namotika ny firenena ity tamin’ny andron’ny fitondrana Andry Rajoelina sy Hery Rajaonarimampianina.
Voafitakan’i Kolonely Mickael Randrianirina izay filoham-panjakana ankehitriny tratran’ireo olona manodidina azy ao anatin’ny fitondrana ankehitriny.
Hatrany amin’ny Praiminisitra Herintsalama Rajaonarivelo sy ny mpikambana maro ao amin’ny governemanta tarihiny dia toa olona tsotra tsy hita izay maha minisitra azy ireo. Tsy tenenina intsony ny zava-doza vokatrin’ny olona tendrena ho tale sy talem-paritra izay misavoritaka tanteraka. Ny olona mahay indray no nosoloina olona vendrana sy badrahodra ka lasa mikorontana ny sampan-draharaham-panjakana maro manerana ny Nosy.
Voafitakin’ny olona manodidina azy ny Kolonely Mickael Randrianirina raha izao zava-misy ankehitriny izao. Tsara ho fantany ankehitriny fa maro ny olona diso fanantenana noho ny fahitana ireo zavatra tsy mandeha amin’izay laoniny izao. Mbola tsy tara raha izao dia mandray fanapahan-kevitra mba tsy hisian’ny nenina aoriana kely ao. Variana amin’ny adin’akoholahy ny fitondrana ka raha tsy miova tetika haingana dia hanahirana azy ireo izao.