Mpangala-bato tamin’ny fifidianana
Tsy mahasahy managadra ny mpanao ratsy ny fitondrana
Nivoaka ny zoma faha 17 Janoary 2025 teo ny vokatrin’ny fifidianana izay ho ben’ny tanàna teto Analamanga. Ny tribonaly administrativa no namoaka ny vokatra ofisialy tamin’izany hoan’ny eto amin’ny faritanin’Antananarivo. Ny any amin’ny faritany hafa dia aorian’izao avokoa vao havoaka.
Tsy hilaza ny vokatra isika fa ny mahakasika ny kolikoly, ny halatra nitranga tamin’iny fifidianana iny no hasiana fanamarihana.
Hoy indrindra ny fitsarana mikasika ity fifidianana ity: be dia be ny hosoka sy ny halabato. Ny fisian’ny biletà hosoka, ny fangalaran-tsonia nataon’ny mpikarakara sy ny olona hafa koa, ny delegen’ny fifidianana nangalatra vato sy sonia ary nampanao petatondro sandoka, ny zandary nasaina nifidy nefa tsy ao anaty lisi-pifidianana sady nafarana avy any amin’ny faritany…Hosoka miavaka mivandravandra sy halatra ampahibemaso no nitranga ary noporofoin’ny fitsarana izany androny.
Fantatra mazava tsara ireo olona ireo ary fantatra ihany koa ny olona naniraka azy ireo nefa dia tsy azo gadraina sy samborina.
Izany no fanjakana malagasy sy tany tan-dalàna izay miady mafy amin’ny kolikoly. Mazava hoazy fa tsy maintsy olona manana fahefana ao amin’ny fitondrana no afaka hanao ireo hosoka sy hala-bato ireo. Jerena fotsiny izy ireo. Ireo no atao hoe tsy maty manota.
Eo anatrehan’izany dia mangina tanteraka ny lalàna sy ny mpampihantra izany eto Madagasikara. Rehefa ny fifidianana ipetrahan’ny aim-pirenena toa izao no feno hosoka sy halatra ary fanamparam-pahefana dia mazava ho azy fa tsy manjary intsony izay ny fitantanana ny firenena ka tsy misy zavatra andrasana aminy intsony satria ben’ny tanàna sy mpanolotsaina mpangalatra no hitondra ny firenena.
Politika
Mifampihantsy ny mpitondra sy ny mpanohitra
Tsy mitsahatra mifampihantsy ny mpitondra sy ny mpanohitra. Mampitandrina mafy ny mpanohitra ny avy amin’ny ekipan’i Andry Rajoelina fa hampihatra lalàna izy ireo hoan’izay manakorontana eo. Ny ankilany indray anefa voamaika mihamaro ny fanakianana izao fitondrana izao.
Isan’ny nisarika ny teo amin’ny fitondrana ny fanambarana nataon’ny kolonely Charles Andrianasoavina izay mialokaloka any ivelany izay mitsikera mafy izao fitondrana izao. Taitra mafy ny jeneraly Sahivelo minisitry ny foloalindahy ka nilaza fa hametraka fitoriana ity kolonely ity.
Nandray fitenenana tsy fanekena momba ny fambolena korontana eto amin’ny firenena ihany koa ny Praiminisitra Ntsay Christian.
Raha ny zava-misy eto Madagasikara dia mikorontana tanteraka ny raharaham-pirenena raha ny fahitana ny fanehoan-kevitra ataon’ny mpitondra sy ny mpanohitra.
Toa hafanafana ny raharaha politika ity manomboka izao raha ny zava-misy.
Fitondrana Andry Rajoelina
Matahotra mafy ny haongan’ny vahoaka
Hatramin’ny Taom-baovao 2025, ka hatramin’izao dia miangavy sy mitalaho amin’ny vahoaka tsy hanaraka ny antsoin’izy ireo ho fanakorontanana eto amin’ny firenena ny filoham-pirenena Andry Nirina Rajoelina sy ireo mpomba azy.
Avilivily amin’izany indray ny sain’ny vahoaka izay sahirana mafy noho ny vidim-piainana. Tao anatin’ny dimy taona nitondran’i Andry Rajoelina izay, nanomboka ny taona 2019 ka hatramin’ny taona 2025 izao dia tafakatra 100 % ny vidim-piainana. Ny vary tamin’ny taona 2019 dia 450 ariary ny kapoaka ka izao lasa 1 200 ariary izao. Tena tsy nahomby ny tetika nentin’ny fanjakana hampandrosoana ny malagasy. Nidangana avokoa ny entana filana andavanandro. Santionany fotsiny ny vidim-bary io.
Ny fahantrana no nanjaka hatramin’izao ary nitombo andro aman’alina izany.
Na inona na inona fomba fanazavana dia sahirana ny vahoaka malagasy ary mijaly tanteraka ankoatran’ ireo ao anatin’ny fitondrana.
Mitaky fiovana maika avy ny fitondrana ny vahoaka nefa tsy hita taratra amin’ny fihetsikin’ny fitondrana izany.
Eo anatrehan’izany dia miaro ny sezany mafy ny fitondram-panjakana ka nanao fanambarana ny filoham-pirenena Andry Rajoelina teny Iavoloha fa tsy handefitra amin’ny mpanakorontana izy. Nomeny baiko ny governora 23 isam-paritra handray andraikitra hoan’ireo izay heverina fa hanakorontana. Ny filohan’ny Antenimierandoholona ny jeneraly Richard Ravalomanana moa dia efa tsy hay intsony ny vava ataony amin’ny fampitahorana ireo tsy mitovy hevitra amin’ny fitondrana. Eto Antananarivo dia nampitandrina ireo izay hanao fihetsiketsehana koa ny préfet de police ny jeneraly Angelot Ravelonarivo fa tsy hilefitra ihany koa hoan’ireo izay mikasa hanao izany.
Tsy misy resaka avoakan’ny ao amin’ny fitondrana ankehitriny raha tsy ny fampitahorana ireo izay mieritreritra hanao fihetsiketsehana na maneho hevitra masiatsiaka amin’ny tsy fandehanan’ny raharam-pirenena amin’izao fotoana izao.
Raha mihaino ny feon’ny vahoaka nefa dia tsy misy mieritreritra ny hanao fihetsiketsehana hanongam-panjakana fa ny ady amin’ny fiainana izay tsy zaka intsony no mampimenomenona azy ireo. Mitady olona hitondra vahaolana ny vahoaka na inona na inona firehana politika misy azy. Ny mpanohitra koa anefa hita fa tsy manana hevitra ary ny mpitondra toa tapadalan-kaleha.
