Ady amin’ny kolikoly : Resaka adala izany eto Madagasikara

Azo lazaina fa resaka adala izany ady amin’ny kolikoly izany eto Madagasikara. Efa nanomboka tamin’ny 2017 no Tafatsangana ny HCJ na ny  » Haute cour de justice » izay natao hitsara ny mpitondra ambony sy hanao fanadihadiana ny filohan’ny andrim-panjakana dia ny filohan’ny repoblika, ny Praiminisitra, ny filohan’ny Sénat sy ny Antenimierampirenena ary ny minisitra ao amin’ny governemanta… Dia mody navoaka ny lalàna dia ny depiote indray no mifehy izany rehetra izany ka rehefa tsy ekeny dia tsy azo kitihina ny atontan-taratasy momba ny kolikoly avo lenta. Minisitra maro no efa manana fitoriana nefa dia tsy misy vokany izany. Ny depiote indray aza no milaza fa tsy handrora mitsilany hono izy ireo fa mpanao politika mitovy aminy ireo ka tsy azo saziana sy gadraina. Ampolony anefa no raharaha mahakasika izany ao hatramin’izao
Tsy hita koa ny tena fahaleovantenan’ny BIANCO sy ny SAMIFIN izay rafitra najoro efa ho roapolo taona hiady amin’ny kolikoly ‘ity. Mandany volam-panjakana sy volambahoaka fotsiny fa tsy mbola nampigadra na iray tamin’ireo mpitondra ambony ireo na iray aza. Mazana dia ireo hirakiraka sy ny olona eo ambany toa ny tale sy ny tale jeneraly eo ambany fifehezan’ny minisitra no migadra sy voasazy hatramin’izao ka tsaraina eny amin’ny PAC na ny fitsarana momba ny ady amin’ny kolikoly. Izay tratra sy tiana hogadraina no midoboka am-ponja fa ny tena tompon’antoka miala madiodio.
Ireo no zavatra misy iainana ao Madagasikara hatramin’izao ary manara-dalàna hono . Ka moa ve tsy ny lalàna mihefy ny kolikoly mihitsy no olana sy ny parlemantera roa tonta ary ny governemanta izay namolavola azy io? Izany no ilazana fa resaka adala fotsiny izany ady amin’ny kolikoly izany eto Madagasikara. Faha 145/180 firenena manerana ny tany isika amin’ny filaharana.
Ankehitriny dia mody miverina manao fivoriana amin’ny ady amin’ny kolikoly indray nanomboka ny herinandro ity satria tonga eto ny FMI na ny tahirim-bola iraisam-pirenena.Ny Praiminisitra mihitsy no mitarika fivoriana sy Sahondra Rabearivelo. Tsy misy zavatra hiova ao fa sinema fotsiny ihany io.