Mbola maro ny Malagasy no manantena fa ny « Concertation Nationale » dia mety ho làlana iray hahafahan’ny firenena miala amin’ireo krizy politika miverimberina sy manokatra pejy vaovao ho an’ny hoavin’i Madagasikara. Kanefa, miaraka amin’izany fanantenana izany, dia misy ihany koa ny ahiahy sy ny fanontaniana mipetraka.
Hatramin’izao, ny zavatra andrasan’ny olom-pirenena indrindra dia tsy kabary na fanambarana fotsiny, fa fanazavana mazava momba ny andraikitry ny FFKM sy ny Fanjakana, ary indrindra ny tetiandro mazava momba ny fanatanterahana ny dingana rehetra.
Tsy vitsy ny mahatsapa fa miadana ny fizotry ny raharaha. Misy koa ireo mihevitra fa lasa mifantoka loatra amin’ny lafiny ara-panjakana sy ara-drafitra ny adihevitra, nefa ny vahoaka kosa miandry ny fomba hahafahany mandray anjara mivantana. Raha ny marina, efa vizana amin’ny krizy politika ny ankamaroan’ny Malagasy. Tsy resaka vaovao intsony no tadiaviny, fa vokatra azo tsapain-tanana.
Ny lesona azo raisina amin’ireo fifampidinihana nasionaly rehetra dia tsotra: raha tsy mazava ny fomba fiasa sy ny fe-potoana, dia mora very ny fitokisan’ny vahoaka. Izany indrindra no mahatonga ny filàna tetiandro mazava sy fantatry ny rehetra. Tsy kisendrasendra raha maro ny mpanara-baovao sy ny fiarahamonim-pirenena no miantso hatrany ny hisian’ny rafitra mazava, fandrindrana hentitra ary tanjona voafaritra tsara amin’ity dingana ity.
Raha ny hevitro, dia azo tanterahina ao anatin’ny dimy ka hatramin’ny enim-bolana ny Concertation Nationale raha tena miainga eny ifotony ny fomba fiasa. Tokony hanomboka eny anivon’ny Fokontany ny fanangonana ny hevitry ny vahoaka, hiakatra any amin’ny Kaominina, Distrika, Faritra, ary hifarana amin’ny sehatra nasionaly. Izay no antoka lehibe indrindra hahazoana antoka fa tena heno ny feon’ny olom-pirenena.
Aorian’izany dia ilaina ny famoahana Boky Fotsy (Livre Blanc) izay hanangona sy handrafitra ireo hevitra sy tolo-kevitra rehetra nipoitra avy amin’ny dinika. Avy eo no hamolavolana ny Pacte National de Refondation, izay ho lasa fifanarahana ara-politika sy ara-moraly iarahan’ny rehetra ekena. Farany, ireo soatoavina sy fanavaozana nifanarahana ireo dia tokony hampidirina ao anatin’ny volavolan-dalàmpanorenana vaovao, izay hatolotra amin’ny fitsapan-kevi-bahoaka.
Mazava araka izany ny làlana tokony harahina:
Fokontany → Kaominina → Distrika → Faritra → Nasionaly → Boky Fotsy → Pacte National de Refondation → Lalàmpanorenana Vaovao → Fitsapan-kevi-bahoaka.
Io ihany no fomba hahazoana antoka fa tsy hijanona ho tatitra apetraka anaty fitoeram-boky ny hevitry ny vahoaka, fa ho lasa fototry ny fanavaozana ny firenena.
Ankehitriny, tsy ny fahavononan’ny vahoaka handray anjara no tena fanontaniana. Vonona izy ireo. Ny fanontaniana lehibe dia izao: vonona ve ireo tompon’andraikitra hampiseho amin’ny Malagasy ny tetiandro mazava, ny dingana mazava ary ny vokatra mazava andrasana?
Raha mazava ny làlana, dia hanaraka ny vahoaka. Raha mazava ny tanjona, dia hanohana ny vahoaka. Fa raha mbola manjaka ny fanjavozavoana, dia ho sarotra ny hananganana ilay fitokisana izay tena ilaina amin’ny fanorenana an’i Madagasikara vaovao.
Enga anie ka tsy ho very eny an-dalana ny feon’ny vahoaka, fa ho tonga mivantana ho fototry ny fanavaozana ny firenena sy ny fanorenana an’i Madagasikara mendrika kokoa ho an’ny taranaka ankehitriny sy ny taranaka ho avy.
Aujourd'hui : 888