Hatramin’ny ela, i Madagasikara dia mbola mitady ny lalana tokony halehany. Ireo krizy nifanesy niainantsika ankehitriny dia manery antsika handinika lalina, tsy ny rafitra sy ny andrim-panjakana ihany, fa indrindra koa ireo soatoavina tokony hanorenana ny Repoblika tiantsika hatsangana.
Amin’izao toe-draharaha iainan’ny firenena izao, dia misy fanontaniana iray tokony hapetraka ihany koa. Hita fa miverina eo amin’ny sehatry ny fiaraha-monina sy ny politika ireo olona maro efa fantatra tamin’ny lasa, na avy amin’ny sehatra politika izany na avy amin’ny sehatra hafa. Mampiseho ny traikefany, ny lazany na ny fahaizany mifandray amin’ny olona izy ireo.
Kanefa, ny fanavaozana ny Repoblika dia tokony hampiditra fomba fijery vaovao : tsy ny laza sy ny endrika aseho amin’ny besinimaro ihany no tokony handrefesana ny olona mitondra andraikitra, fa indrindra ny asa vita, ny vokatra azo ary ny tena fandraisana anjara amin’ny fampandrosoana ny firenena.
Tsy tokony hiverina amin’ilay fomba fanao taloha fotsiny isika, izay ny endrika ivelany sy ny kabary matetika no misongadina. Ny Repoblika vaovao dia tokony hanome lanja ny andraikitra, ny fahamendrehana ary ny porofo amin’ny alalan’ny asa sy ny vokatra.
Ny fanavaozana ny Repoblika dia tsy tokony ho fanovana rafitra fotsiny ihany. Tokony ho fanovana fomba fijery ihany koa: fomba fijery momba ny maha-olona, momba ny maha-olom-pirenena, ary momba ny anjara andraikitry ny tsirairay amin’ny fananganana ny Firenena.
Fotoana lehibe ho an’i Madagasikara izao fotoana anatanterahana ny “Concertation Nationale” izao. Fotoana tokony hiarahan’ny Malagasy rehetra mieritreritra hoe:
Firenena manao ahoana no tiantsika hatsangana ho an’ny zanatsika sy ny taranaka ho avy?
Fa alohan’ny hiresahana Lalàmpanorenana, rafitra vaovao na fanovana ara-panjakana dia misy fanontaniana lehibe iray tokony hapetraka:
Manome lanja sy manaja ny olom-pirenena tsotra ve isika?
Taloha, ny fanirian’ny ankamaroan’ny olona dia tsotra nefa manan-danja: hanangana fianakaviana mendrika, hiasa amim-pahitsiana, hanome fanabeazana tsara ho an’ny zanaka ary, raha azo atao, hamela ho an’ny taranaka zavatra tsara kokoa noho izay noraisin’izy ireo.
Tsy dia maro no nieritreritra ny ho lasa olona malaza na miavaka manokana. Nisy tokoa ireo olona niavaka teo amin’ny tantara, saingy vao mainka nisongadina izy ireo satria ny fiaraha-monina dia nanaja sy nanome hasina ireo fiainana tsotra ihany koa. Ankehitriny anefa dia toa niova izany toe-tsaina izany.
Toa terena ny olona rehetra mba ho « miavaka »: ho malaza kokoa, ho hita sy hohenoina kokoa noho ny hafa, ho voalohany indrindra, ho manankarena kokoa. Matetika ny fahombiazana dia refesina amin’ny vola, ny laza na ny toerana misy eo amin’ny fiaraha-monina.
Izany no mahatonga olona maro ho very fahatokisana, hifampitaha lalandava ary hahatsapa fa mbola tsy ampy izay vitany.
Kanefa, tsy olona vitsy miavaka no mampijoro firenena iray.
Ny tena herin’i Madagasikara dia ireo olona an-tapitrisany manao ny andraikiny isan’andro amim-pahitsiana sy fahatokisana.
Ny tantsaha Malagasy mamokatra sakafo.
Ny mpampianatra Malagasy manabe ny taranaka.
Ny mpitsabo mikarakara ny marary.
Ny mpanao asa tanana, ny mpivarotra, ny mpandraharaha, ny mpiasam-panjakana, ny mpitondra eny ifotony, ary ireo ray aman-dreny mampita soatoavina amin’ny zanany.
Ireo no mampiaina ny Firenena.
Noho izany, ny tena fanavaozana dia tokony hanomboka amin’ny fanovana fomba fijery.
Tsy ny harenan’olom-bitsy na ny lazan’olom-bitsy no tokony handrefesana ny halehiben’ny firenena iray, fa ny hasina sy ny fahamendrehana omena ny olom-pirenena rehetra.
Tokony ho afaka hilaza amin’ny Malagasy tsirairay ny Repoblika hoe:
« Manan-danja ny asanao. Ilaina ny andraikitrao. Hajaina ny fahamendrehanao. »
Satria tsy lalàna sy rafitra ihany no mampatanjaka ny Repoblika. Ny tena fototra dia olom-pirenena mahatsapa fa hajaina, henoin’ny Fanjakana ary tompon’andraikitra amin’ny hoavin’ny fireneny.
Ny Repoblika vaovao dia tsy tokony hiezaka hamorona olona vitsy ho deraina fotsiny, fa tokony hanangana olom-pirenena maro mahay mandray andraikitra sy vonona hanompo ny tombontsoa iombonana.
Koa izao no fanontaniana lehibe tokony hodinihintsika: Te hanangana fiaraha-monina izay samy te hihoatra ny hafa ve isika? Sa te hanangana firenena izay samy manao tsara sy amim-pahitsiana ny andraikitra tandrify azy?
Tsy hisy Repoblika matanjaka raha tsy misy olom-pirenena matoky tena sy mifampatoky.
Ny fanomezana hasina ny olom-pirenena tsotra dia tsy midika hoe miala amin’ny fandrosoana na ny fahombiazana. Midika kosa izany fa ekena fa ny tena haren’ny firenena dia ireo lehilahy sy vehivavy Malagasy an-tapitrisany izay manao ny adidiny isan’andro, na tsy malaza aza.
Angamba ny fototra voalohany amin’ny fanavaozana an’i Madagasikara dia ny famerenana amin’ny Malagasy tsirairay ny hambom-po amin’ny maha olom-pirenena tsara, ilaina ary tompon’andraikitra azy.
Aujourd'hui : 1048