Nampahafantatra tamin’ny fomba ofisialy ny Fanampiana ara-teknika ho an’ny Refondation ny Programa-n’ny Firenena Mikambana ho an’ny Fampandrosoana (PNUD), teo anatrehan’ireo tompon’andraiki-panjakana eto Madagasikara. Ity rafitra ity dia natao hanohanana ireo andrim-panjakana amin’ny ezaka fanavaozana sy fanatsarana ny fomba fiasany.
Tsy hahazo ny fitokisan’ny olom-pirenena maharitra ny andrim-panjakana iray satria hoe mahay mifandray amin’ny vahoaka na manao serasera betsaka. Ny fitokisana dia azo rehefa hita mazava, porofoina amin’ny zava-bita, fa tena mitondra fiovana hita maso eo amin’ny fiainan’ny olona ny asany.
Tokony hianatra lesona iray lehibe isika. Matetika ny serasera ataon’ny andrim-panjakana dia mifantoka amin’ny fitaovana sy loharanom-bola nampiasaina (inputs) na amin’ny asa vita (outputs). Marina fa ilaina izany satria mampiseho ny ezaka natao sy manome lanja ny asan’ny andrim-panjakana. Kanefa, raha tiana ny hahazoan’ny vahoaka fitokisana, dia tsy maintsy aseho koa ny vokatra tena azo, ny fahombiazana tratra ary ny fiantraikany mivantana eo amin’ny fiainan’ny olom-pirenena.
Izany indrindra no tokony hijerena ny fanombohana ity Fanampiana ara-teknika ho an’ny Refondation ity. Ny tanjony dia ny hanampy ireo andrim-panjakana hanatsara ny fahombiazany sy ny kalitaon’ny tolotra omeny ny vahoaka. Ny fisian’ireo 170 points focaux dia mampiseho fa misy finiavana hampandray anjara ireo tompon’andraikitra amin’izany dingana izany.
Valiny iray amin’ny fanamby lehibe io: fananganana fitantanan-draharaham-panjakana mahomby kokoa, akaiky kokoa ny olom-pirenena ary mifantoka amin’ny vokatra. Kanefa, mihoatra noho ny lanonam-panombohana sy ny fitaovana nampiasaina, dia fanontaniana iray ihany no tena zava-dehibe:Inona marina no fiovana ho tsapan’ny Malagasy?
Inona avy ireo tolotram-panjakana hihatsara?
Inona ireo fotoana hiandrasana izay hihena?
Inona ireo fomba fiasa hohatsorana?
Ahoana no hahafahan’ny olom-pirenena mandrefy ny tena fandrosoana vita?
Raha tiana ny hahazoan’ity fanavaozana ity ny fitokisan’ny vahoaka, dia ilaina ny mametraka tanjona mazava, mari-pandrefesana ny fahombiazana ary mampahafantatra tsy tapaka amin’ny rehetra ny vokatra azo.
Tsy tokony ho ny isan’ny manam-pahaizana nampiasaina, na ny isan’ny fiofanana natao, na ny isan’ny andrim-panjakana notohanana no handrefesana ny fahombiazan’ity tetikasa ity. Ny tena hitsarana azy dia ny vokatra hita maso: tolotram-panjakana mora azon’ny olona, fomba fiasa tsotra kokoa, andrim-panjakana mahomby kokoa ary fitokisana vaovao eo amin’ny Fanjakana sy ny olom-pirenena.
Tsy ampy ny milaza hoe havaozina ny fitantanan-draharaham-panjakana.
Tsy maintsy aseho izany.
Ny tena fahombiazan’ity hetsika ity dia izay ho hitan’ny Malagasy eo amin’ny fiainany andavanandro. Ny Refondation dia tsy hahazo ny heviny raha tsy misy vokatra hita maso, azo refesina ary zaraina amin’ny rehetra.
Raha tsy izany, dia ho « business as usual » ihany ny Refondation: ho betsaka ny fanambaràna, ho betsaka ny hetsika, ho betsaka ny serasera, nefa amin’ny farany dia tsy hisy fiovana lehibe ho tsapan’ny olom-pirenena.
Aujourd'hui : 837