Ny tena fitsarana dia tsy amin’ny olona iray, fa amin’ny Fanjakana malagasy mihitsy.
Tsy raharaha ara-pitsarana tsotra ny raharaha Mamy Ravatomanga, ilay mpandraharaha akaikin’ny filoha teo aloha Andry Rajoelina. Izy dia manambara olana lalina kokoa, olana fototra : Fanjakana iray voasaringotra ao anatin’ny fifangaroan’ny tombontsoa manokana sy ny tombontsoam-bahoaka.
Eo ambany fitondran’i Rajoelina, ny fitantanana ny raharaham-panjakana dia toa rafitra mafia ahitana fifamatoran’ny vola, ny fahefana ary ny fahanginan’ny andrim-panjakana.
Ao ambadik’ity raharaha ity dia mipetraka fanontaniana lehibe ho an’ny rehetra :
Iza marina no mitantana ny Fanjakana ? Iza no manara-maso ? Ary iza no mandoa ny vidiny ?
Ravatomanga, sarin’ny rafitra miasa mangina
Ny raharaha Ravatomanga dia fitaratry ny fomba fiasan’ny fitondrana ankehitriny : mpandraharaha manana fahefana sy tambajotra manerana ny sehatra rehetra, manomboka amin’ny toekarena ka hatramin’ny politika, manana rohy lalina amin’ny fitsarana sy ny sehatra ara-bola, ary misy fikorianan’ny vola mankany ivelany sarotra arahina.
Eo am-panaovana izany rehetra izany, malemy ny Fanjakana, misalasala ny fitsarana, ary tsy re ny feon’ny vahoaka.
Fahatezeran’ny vahoaka sy fahanginan’ny andrim-panjakana
Manomboka miroborobo ny fahatezerana manerana ny firenena.
Voalohany, satria efa lasa rafitra niorim-paka ny kolikoly sy ny fifampihavanana amin’ny tombontsoa.
Faharoa, satria ireo andrim-panjakana tokony hiaro ny mangarahara — Banky Foibe, Tahirim-bola nasionaly, Fitsarana — dia toa mangina tanteraka, na matahotra, na tafiditra ao anatin’ilay rafitra ihany koa.
Mampametra-panontaniana ny vahoaka :
Ahoana no nahafahan’ny vola an’arivony tapitrisa nihetsika sy nentina tany ivelany tsy nisy fanairana na fanadihadiana?
Raha marina fa nisy vola fanjakana nandalo tamin’ny Banky Foibe na ny Fonds souverain ka nentina tany Maorisy, nahoana no tsy mbola nisy fanamarinana natao ampahibemaso?
Ary nahoana ny Praiminisitra ankehitriny no tsy manome baiko hanaovana audit mangarahara mba hanazavana amin’ny vahoaka?
Fampisafotofotoana sa fiverenana amin’ny rariny ?
Maro no mino fa tsy tena fitsarana akory ity raharaha ity, fa fampisafotofotoana politika indray.
Tetikady hanehoana ivelany fa miady amin’ny kolikoly ny fanjakana, kanefa ny tena tambajotra manodidina ny fahefana sy ny vola dia mbola tsy voakitika akory.
Raha tsy ho rava sy ho hita mazava ireo tambajotra ireo, raha tsy hohadihadiana sy havaozina ireo andrim-panjakana, dia hijanona ho ao anatin’ilay faribolana mahazatra i Madagasikara : olana iray, loha iray mianjera, fa ny rafitra mitoetra.
Fotoan’ny fahamarinana sy fanavaozana
Ny vahoaka malagasy dia reraka amin’ny fampanantenana. Tsy mila “seho ara-pitsarana” fotsiny izy, fa mila fahamarinana, mangarahara ary fanavaozana marina.
Raha tsy tonga amin’ny tena fanadiovana ny Fanjakana ity raharaha ity, dia hirodana hatrany ny fitokisan’ny vahoaka sy ny fahatsapan’ny rehetra ny rariny.
Tonga ny fotoana tokony hanovàn’i Madagasikara ny kolikoly ho lasa fanavaozana.
Izay no tena fitsarana tokony hatao — tsy amin’i Mamy Ravatomanga irery, fa amin’ny rafitra iray manontolo izay nanao kolikoly ho toy ny fomba fitondrana.
Aujourd'hui : 326