Naina Andriantsitohaina TSY HANAO POLITIKA INTSONY?

Tapa-kevitra tsy hanao politika intsony hono i Naina Andriantsitohaina araka ny kabary nataony nandritra ny famindram-pahefana teo aminy sy ny jeneraly Lylyson Urbain de René. Mihevitra ny gasy ho mora manadino mihitsy ve ireto « mafy be sy tompon’ny tanàna » taloha ireto e?
Ilay ben’ny tanànan’Antananarivo renivohitra mba efa mody nifona tamin’ny vahoakan’Antananarivo fa i Naina Andriantsitohaina kosa dia tahaka ny madio tsy misy pentina ny fiheverany ny tenany ka hoe « tsy hanao politika intsony aho ».
Izy no tsy hanao politika intsony satria tapa-doha avokoa ireo roalahy lehibeny: Andry Rajoelina very zom-pirenena Malagasy, Mamy Ravatomanga midoboka atsy Maorisy ary mbola handrasan’ny FBI.
Azo hinoana fa hanao fanambarana tahaka ity nataon’i Naina Andriantsitohaina ity ny senatera Nicolas Rabemananjara. Mamy Ravatomanga mantsy no lehiben’izy roalahy voalaza anarana etsy ambony ary tena nisetrasetra tokoa tamin’ny fotoana nanjakan’izany PDG izany.
Mbola vao manomboka ny lalao. Vita aloha izay ny anareo, nahazaka ny famotehana sy ny famonjana aman-taonany, miampy ny herisetra tamin’ny endriny maro ireo olona nosomparanareo. Ny fanontaniana mipetraka dia hoe mba hahazaka ve ianareo atsy ho atsy?