Ny maha-firenena ny firenena dia ny olombelona miaina ao anatiny.

Saingy misy loza mangina mitranga eto Madagasikara. Ao anatin’ny aloky ny fahefana, misy indraindray ireo manam-pahefana mampiely fankahalana sy fizarazarana eo amin’ireo foko malagasy samihafa. Tsy kisendrasendra izany. Tetika politika efa tranainy izy io: rehefa ampifandrafesina ny vahoaka dia mora kokoa ny mitazona rafitra mpiremby izay manompo ny tombontsoan’ny vitsy an’isa.

Rehefa mifanditra ny samy Malagasy, dia tsy miaro ny firenena intsony. Ary rehefa tsy miaro ny firenena ny vahoaka dia mora ny maka an-keriny ny Fanjakana, mora ny manodina ny harena iombonana, ary mora ny manapaka tsy misy fanaraha-maso.

Izany no loza lehibe indrindra atrehintsika ankehitriny: ny fahazarana mampisaraka ny samy Malagasy mba hahafahan’ny rafitra mpiremby maharitra.

Kanefa raha mitohy izany dia misy vokany lalina kokoa. Tsy ny firaisankina ihany no potika. Fa mety ho potika koa ny lanjan’ny Malagasy eo amin’ny tontolo iraisampirenena.

Ao anatin’izao tontolo fehezin’ny fifaninanana sy ny fahaiza-mamorona izao dia tsy ampy intsony ny hoe misy firenena iray. Ny fanontaniana apetraky ny tantara dia tsotra nefa henjana:

Inona marina no anjara biriky entin’ny Malagasy ho an’izao tontolo izao?

Ny firenena izay tsy mamorona, tsy mieritreritra ary tsy mahalala ny maha-izy azy dia lasa tsy hita maso. Ary ny firenena tsy hita maso dia lasa toerana iasan’ny tombontsoan’ny hafa.

Raha jerena amin’ny marina anefa dia tsy hoe tsy mahay ny Malagasy. Ny olana dia hafa: tsy nampianarina hieritreritra lalina, tsy namporisihina hamorona, ary tsy namporisihina hanana fahasahiana.

Nianatra mba hamerina lesona.
Miasa mba hanatanteraka baiko.
Manaraka fitsipika fa tsy mieritreritra.
Miaina nefa tsy mahalala hoe nahoana.

Lasa toy ny milina.

Maro no zatra nampianarina hanaraka fotsiny fa tsy hitarika. Zatra miandry fa tsy mamolavola. Manatanteraka baiko fa tsy mamorona lalana.

Firenena toy izany dia mora ampiasain’ny hafa.

Fa ny firenena mahafantatra ny maha-izy azy, mamorona ary sahy mieritreritra ihany no tena lasa ilaina amin’ny izao taon-jato faha-21 izao.

Tsy hoe tsy ilaina ny Malagasy. Fa raha tsy fantatsika ny maha-izy antsika, raha avelantsika hampisaraka antsika ny politika, raha manaiky hoentina toy ny vahoaka tsy mieritreritra isika, dia ho lasa any an-tsisiny.

Ary amin’izao tontolo izao dia tsy misy miandry ny firenena malemy.

Raha tsy manapa-kevitra ny ho ilaina isika dia tsy hisy hanao antsika ho ilaina.

Noho izany dia misy fanontaniana lehibe tsy maintsy apetraka amin’ny tenantsika:

Vonona ve isika hiaro ny firaisankin’ny Malagasy sy ny fahamendrehan’ny Fanjakana? Sa avelantsika hozarazaraina sy hohazonin’ny rafitra mpiremby mandrakizay i Madagasikara?

Ny hoavin’ny firenena dia miankina amin’ny valin’io fanontaniana io.

Tsy ny foko no hamonjy an’i Madagasikara, fa ny firaisan’ny Malagasy, izay iray tsy mivaky.