Raharaham-pirenena : Aza miady an-trano fa tsy misy mpanohitra intsony izao

Isan’ny fitondrana nahazo tombony ny fitondrana Fanavaozana ity satria tsy misy mpanohitra mihitsy . Ny mpomba ny filoha teo aloha Andry Rajoelina sy Mamy Ravatomanga no saika mba hanohitra teo nefa nangina tanteraka ankehitriny. Ny olana amin’io fitondrana io dia ny tsy fitoviam-pijery ao anatiny ka samy mitondra amin’ny saim-pantany avokoa. Tonga hatrany amin’ny ady an-trano aza ny raharaha raha ny fahitana azy avy ety ivelany. Tsy izany ihany fa mamoaka ny tsiambaratelo ao amin’ny fitondrana koa ireo mpiara-miasa amin’ny Filoham-panjakana Michael Randrianirina, izay zavatra tsy fahita loatra amin’ny fitondrana tia ny nitranga tamin’ny fahitalavitra ny faran’ny herinandro teo. Matetika koa no ahenoana ady an-trano ao anatin’io fitondrana io.
Voatendry ny Praiminisitra vaovao ka asa na ho afaka hamaha izany olana izany izy fa raha ny zava-misy teto Madagasikara dia ny ady an-trano ity no naharava azy ireny hatramin’ny repoblika voalohany ka hatramin’izao. Mba todiho ihany ny tantara fa ahitana lesona izy ireny.