Fandalinana zaraina mety hahasoa ny tanindrazana mikasika ny fiainam-pirenena.

Lalana tsara indrindra amin’ny “Refondation” dia ny fametrahana ny “Andry fahaefatra amin’ny Repoblika: ny Vahoaka Malagasy”.

Mila fanavaozana lalina ny fiainam-pirenena eto Madagasikara, indrindra eo amin’ny lafiny politika, dia mba hanamafisana ny tena demokrasia izay efa iainan’ny Malagasy eny amin’ny faritra rehetra eny.

Ny tanjona dia ny hahatonga ny olom-pirenena tsy ho mpifidy fotsiny isaky ny dimy taona, fa ho tena mpandray anjara mavitrika amin’ny fanorenana ny hoavin’ny firenena.

Mila averina mandanjalanja indray ny fiainam-pirenena eto Madagasikara, mba tsy ho ny mpitondra ihany no manana ny fahefana rehetra, fa mba hahazo lanja bebe kokoa koa ny vahoaka amin’ny fanapahan-kevitra lehibe.

Ny demokrasia dia midika hoe “ny vahoaka no tompon’ny fahefana”. Midika izany fa ny fanjakana dia tokony hiasa ho an’ny vahoaka, ary ny vahoaka dia tokony ho afaka manara-maso sy mandray anjara amin’ny fitantanana ny firenena.

Ho an’ny tena fanavaozana lalina ny rafitra politika eto Madagasikara, dia ilaina apetraka mazava fa ao anatin’ny andrin’ny rafitra rehetra dia tokony hisy ny fifehezan’ny vahoaka sy ny fanaraha-maso ataon’ny olom-pirenena.

Midika izany fa tsy ampy intsony ny mifidy mpitondra isaky ny taona vitsivitsy fotsiny, fa mila rafitra ahafahan’ny vahoaka :

• manara-maso akaiky ny asan’ny mpitondra,
• maneho hevitra amin’ny fanapahan-kevitra lehibe,
• ary afaka manitsy na manohitra raha tsy mifanaraka amin’ny tombontsoan’ny firenena ny politika ampiharina.

Efa am-polony taona maro izao no nifidianan’ny Malagasy ny mpitondra azy. Zava-dehibe ny fifidianana satria io no ahafahan’ny vahoaka misafidy izay hitondra ny firenena.

Kanefa, maro ny olom-pirenena no mahatsapa fa rehefa tapitra ny fifidianana dia vitsy ny fotoana ahafahan’izy ireo maneho hevitra sy mandray anjara amin’ny fanapahan-kevitra lehibe momba ny firenena. Noho izany, maro no diso fanantenana.

Any amin’ny firenena maro, dia misy fomba ahafahan’ny olom-pirenena mandray anjara mivantana kokoa amin’ny raharaham-pirenena amin’ny alalan’ny “initiative populaire”, “référendum”, ary ny fandraisana anjaran’ny olom-pirenena amin’ny adihevitra lehibe.

Ho an’i Madagasikara, azo akana lesona izany. Ka misy fanavaozana telo lehibe mety hanamafy ny demokrasia sy hampifandray bebe kokoa ny vahoaka amin’ny fitantanana ny firenena.

Voalohany amin’izany dia ny fametrahana ny “Filankevitry ny Vahoaka Malagasy”

(Convention Citoyenne Nationale – Feon’ny olom-pirenena eo anivon’ny Repoblika)

Matetika, ny fanapahan-kevitra lehibe dia ifampidinihan’ny mpanao politika, ny teknisianina ary ny manam-pahaizana.

Fa ny vahoaka tsotra koa dia manana traikefa sy fahalalana avy amin’ny fiainana andavanandro izay tena ilaina amin’ny fanapahan-kevitra.

Noho izany dia azo atsangana ny Filankevitry ny Vahoaka Malagasy.

Olom-pirenena avy amin’ny faritra rehetra eto Madagasikara no hofantenana amin’ny alalan’ny antsapaka, mba hisolo tena ny fahasamihafan’ny Malagasy.

Hiara-hidinika izy ireo momba ny olana lehibe toy ny :

• fanabeazana,
• kolikoly,
• fambolena,
• harena ankibon’ny tany,
• tontolo iainana,
• asa sy fampandrosoana.

Hihaino manam-pahaizana izy ireo, hifanakalo hevitra, ary hanolotra soso-kevitra ho an’ny Governemanta sy ny Antenimiera.

Tsy hisolo ny olom-boafidy izany, fa hanampy ny fanjakana handray fanapahan-kevitra mifanaraka kokoa amin’ny filan’ny vahoaka.

Ny Faha roa dia ny fametrahana Fitsapan-kevi-bahoaka Atomboky ny Olom-pirenena

(Tolo-kevi-bahoaka / Initiative Populaire)

Ankehitriny, ny fanjakana na ny mpitondra no tena manapa-kevitra ny hanao fitsapan-kevi-bahoaka.

Fa azo omena fahefana bebe kokoa ny vahoaka.

Raha misy raharaha iray heverin’ny vahoaka ho tena zava-dehibe, dia afaka manangona sonia izy ireo.

Raha mahatratra isa voafaritra ireo sonia ireo, dia tsy maintsy dinihina na alefa amin’ny fitsapan-kevi-bahoaka ilay tolo-kevitra.

Mety ho :

• lalàna vaovao,
• fanitsiana lalàna,
• fanafoanana lalàna,
• fanavaozana ny Lalàmpanorenana.

Izany no antsoina hoe Tolo-kevi-bahoaka (Initiative Populaire), izay anisan’ny fototry ny demokrasia mivantana.

Amin’izany fomba izany dia tsy ny mpanao politika ihany no afaka mitondra hevitra vaovao, fa ny vahoaka koa.

Ary ny Faha telo dia ny fametrahana Zo Hanolotra Fitakiana amin’ny Fanjakana

(Droit de Pétition)

Maro ny Malagasy no mahatsapa fa tsy voahaino ny feony rehefa misy olana lehibe.

Noho izany dia azo ampidirina ao amin’ny Lalàmpanorenana ny Zo hanao Fangataham-bahoaka (pétition).

Midika izany fa raha maro ny olom-pirenena manao sonia fangatahana iray :

• tsy maintsy dinihin’ny Antenimiera izany,
• tsy maintsy valian’ny Governemanta izany,
• ary amin’ny toe-javatra sasany dia mety hoentina amin’ny fitsapan-kevi-bahoaka aza.

Tsy ho afaka hangina na tsy hamaly ny fitakian’ny vahoaka intsony ny manampahefana.

Ho lasa lalan’ny fifampiresahana ara-dalàna eo amin’ny vahoaka sy ny fanjakana izany.

Raha fintinina, ny tena fanavaozana ilaina dia izao : ny fahefana dia avy amin’ny vahoaka, ary tokony hijanona eo ambany fanaraha-mason’ny vahoaka hatrany ny fitondrana.