Tokony tsy hatao ao anatin’ny adihevitra ampahibemaso ny fanatsoahan-kevitra haingana na “raccourci” amin’ny zava-misy politika. Zava-dehibe anefa ny mampahatsiahy fa tsy mitovy ny fiarovana ny zon’olombelona sy ny fitakiana fitsarana ara-dalàna amin’ny fanamaivanana na fanaronana heloka bevava.
Tokony hazava tsara fa ny rariny sy ny fitsarana mangarahara no fototra, mba tsy hisy ho voaheloka tsy ara-drariny, ary tsy hisy koa ho afa-miala amin’ny andraikiny raha tena nisy ny fandikan-dalàna.
Eo amin’ny lafiny iray, tsy azo ekena ihany koa ny toe-javatra misy olona na mpitondra sasany voalaza fa nanao fanodinkodinam-bolam-panjakana, dia nandositra, ka avy eo mampiasa sehatra na rafitra iraisam-pirenena hilazana ny tenany ho “mpitsoa-ponenana ara-politika”.
Mila jerena amin’ny fahamatorana sy fahamarinana izany, satria tsy tokony afangaro ny resaka heloka bevava sy ny tena fiarovana ara-politika marina.
Tsara raha entina amin’ny fanajana sy fandalinana lalina ny adihevitra rehetra, fa tsy amin’ny fiampangana mialoha na fanatsoahan-kevitra maimaika. Ny tombontsoan’ny firenena dia mitaky fifampihainoana sy fahendrena, mba hanavahana mazava ny olan’ny zon’olombelona sy ny raharaha fitsarana ara-dalàna. Raha miorina amin’ny fahamarinana sy ny porofo ny fifanakalozan-kevitra, dia mora kokoa ny manorina firaisankina sy vahaolana maharitra ho an’i Madagasikara, fa tsy mampitombo fifandirana.
Aujourd'hui : 925