Barazin’i Beboka: Ndrao ho lasa Népal?

Loza mitatao no azo handikana ny tatitra vokatry ny fitsirihana ny barazin’i Beboka. Tsy manaraka ny fenitra amin’ny asa vaventy ny fitantanana sy ny akora nampiasaina nanamboarana ity tohadrano goavana ity. Vola manodidina ny 12 miliara Ar nefa no efa lasan’ny orinasa niantoka ny fanamboarana azy, izany 100%.
Ilay teratany italiana, Michèle Franchi, vadin’i Brigitte Razaka no nahazo ny tolotr’asa, tamin’ity tetik’asa ity. Tsy zoviana amin’ny mpanara-baovao moa i Brigitte Razaka, izay niray petsapetsa tamin’ny fitondrana Rajoelina, indrindra fa i Naina Andriantsitohaina sy Mamy Ravatomanga. Tsy eto Madagasikara irery ihany fa misy raharaham-pitsarana momba azy koa any Angletera.
Mila mandray fanapahan-kevitra matotra manoloana ity loza ity mitatao ity ny fitondram-panjakana, ndrao sanatria ka ho lasa tahaka ny zava-nitranga tany Népal ny volana aogositra lasa teo.
Ho avy tokoa mantsy izao ny fahavaratra sy ny vanim-potoanan’ny rivodoza.