Misedra olana goavana amin’izao ny fanatanterahana ireo tetikasan’ny Fanjakana, indrindra fa eo amin’ny fananganana fotodrafitrasa. Ny antony, zara raha misy orinasa na mpandraharaha mamaly intsony ireo antso tolo-bidy atao eo anivon’ny tsenam-baro-panjakana (marché public). Tsy manana fahatokisana intsony ireo mpandraharaha malagasy sy vahiny efa nanao fifanarahana tamin’ny Fanjakana fa ireo izay mbola vahiny sisa no mbola sahy miditra, saingy vitsy kely izy ireo raha ny loharanom-baovao.
Fantatra ankehitriny fa voatery midina ifotony mitady mpandraharaha hanatanteraka tetikasa ireo olona tompon’andraikitra amin’ny tsenam-baro-panjakana (Personne Responsable des Marchés Publics) noho izany toe-javatra izany satria na efa tsy najanona daholo aza ny fananganana fotodrafitrasa vaovao eran’ny Nosy, dia mbola maro ireo tsy maintsy tohizana hatramin’ny farany na mila fanamboarana, raha tsy hiresaka afa-tsy ny fanamboarana ireo lalana sy lalam-pirenena simba tanteraka. Tsiahivina ihany mantsy fa maro tamin’ireo orinasa na mpandraharaha efa nanantanteraka tetikasam-panjakana nanomboka tamin’ny taona 2021 no mbola tsy naharay vola tamin’ny Fanjakana mihintsy, miisa 200 izy ireo raha ny fantatra.
Tsy mitsahatra ny manantona mivantana any amin’ireo tompon’andraikitra eny anivon’ny ministeran’ny fitantanam-bola sy ny teti-bola sy ny Tahirim-bolam-panjakana ireto mpandraharaha ireto, saingy tsy misy havaly intsony ireo tompon’andraikitra fa mandrirarira fotsiny sisa. Izany no zava-misy eto amin’ny firenena, ankehitriny, saingy tsy mba miresaka momba izany mihintsy ny minisitry ny toekarena sy ny fitantanam-bola Rindra Hasimbelo Rabarinirinarison. Ho an’ireo mpandraharaha tsy mbola nahazo vola hatramin’izao moa dia ity minisitra misahana ny kitapom-bolam-panjakana ity mihintsy no tena fositry ny olana.
