Fifidianana filohampirenena 2023 : Vonona ny lohandohan’ny mpanao politika

Miharendrika ny firenena malagasy, dia i Madagasikara izay ahitana malagasy 28 tapitrisa mahery. Hatreto dia resy lahatra ireo lohandohan’ny mpanao politika maro eto amin’ny firenena , ka mivonona handray anjara mavitrika amin’ny fifidianana filohampirenena amin’ny 9 novambra 2023. Araka nambaran’i James Rasoamaka filohan’ny Mamiko ny Taniko Madagasikara (MTM) omaly tetsy Avaradrano. Araka izany dia nanamafy izy fa mbola rafitry ny mpanjanan-tany no nitantanana ny tany sy ny firenena izay nolovaina tamin’ny frantsay. Ary olona voavolavolan’ny mpanjanaka koa no nisahana ny fitantanan-draharaha tamin’izany, mandrak’ankehitriny. Tsy nohadinoiny koa ny nanamarika hoe « misy ny tandapa namadika ». Very ny soatoavina malagasy eto amin’ity nosy ity hoy hatrany izy. Manentana ny malagasy mpiray tanindrazana izy handray an-tanana amin’ny fanarenana ny firenena mba ho rehareha eo anatrehan’izao tontolo izao. Potika ny fiainam-pirenena eo amin’ny sehatra rehetra ka tsy hamela ny firenena mbola hatao tantely afa-drakotra indray, indrindra ny fahaverezan’ny soatoavina Malagasy, dia ny hamerina ny hasin’ny fiaindrianam-pirenena amin’ny laoniny i James Rasoamaka (MTM) raha ny filazany .
Mivonona ny hanarina ny firenena toa azy koa ireo filohan’ny antoko politika izay efa naneho hevitra ny hiroso amin’izay fifidianana filohampirenena, dia Hajo Andrianainarivelo (MMM), Ravalomanana Marc (TIM), Rajaonarimampianina Hery (HVM), Paraina Auguste (ATT), Tahina Razafinjoelina (FTT), Pasitora André Mailhol (GFFM) ary re koa araka ny tsilian-tsofina ny ho filatsahan-dRavatomanga Mamy sy Andry Rajoelina ihany koa. Teboka iombonan’ireo filohan’antoko ireo dia ny hafatra mafonja izay miantefa amin’ny CENI na ny Vaomierampirenena mahaleotena misahana ny fifidianana, dia ny hahalavorary ny fifidianana hotanterahana eto amin’ny firenena an-tsakany sy an-davany , ary hanjaka hatrany ny mangaraharaha. Hetaheta ihany koa ny hitondra fanovana mahery vaika izay hivoahan’i Madagasikara amin’izao kizo fara mihatra izao. Enga anie ka tsy ho lasa kobaka am-bava avokoa izany sao hampitombo ny otriky ny fampahantrana apetraky ny mpanjanaka araka ny voalaza etsy ambony.