Lola Rasoamaharo, Mahery Lanto Manandafy, Foutsie Tsosy: Sady tsy nandohalika no tsy nifona

Ho tambin’ny fahafahana ara-panenjehana atao amin-dRasoamaharo Lola , sy Mahery Lanto Manandafy ary Foutsie Tsosy eny amin’ny fitsarana , dia re fa noterena hifona sy handohalika ry zareo, araka ny baiko midina hatrany. Koa satria tsy nanatanteraka izany dia nampidirina am-ponja no heverin’ny mitana ny fahefana ho sahaza azy ireo. Atao lazon’ady mihitsy, amin’izay fotoana izay dia ho maty momoka na halemy ny fahefana eo am-pelatanana, fa indrindra ny ara-pahasalamana. Katsahin’ireo mpibaiko , dia tsy iza fa i Mamy Ravatomanga, hanerena an’ireo olona ireo handohalika ny hibaribarian’ny tahotra eo amin’ny malagasy tsirairay fa « tsy misomonga i mamy ravatomanga ka tsy maintsy milefitra eo anoloany ».
Vakiana bantsilana koa fa misy dian-tanan-dRavatomanga ny fahefam-pitsarana eto amintsika, mba tsy hitenenana hoe eo ambany gejan-dRavatomanga Mamy ny Fitsarana malagasy. Na ny fitsarana an’i Lola Rasoamaharo aza hatramin’izao dia tsy hita fototra hoe mby hatraiza ary aiza ho aiza ny tohin’ny raharaha  sy ny didim-pitsarana farany? Mibaribary ny hafetsen’ Ingahy Ravatomanga Mamy satria dia ny anaran-dRajoelina hatrany no ataony fiadiana ho azy ka tsy ho voahoso-potaka mihitsy ny anarana Mamy Ravatomanga na aiza aleha na inona ambara na ahoana ny atao.