Fitondrana Andry Rajoelina : Matahotra mafy ny haongan’ny vahoaka

Hatramin’ny Taom-baovao 2025, ka hatramin’izao faha 15 Janoary 2025 izao dia miangavy sy mitalaho amin’ny vahoaka tsy hanaraka ny antsoin’izy ireo ho fanakorontanana eto amin’ny firenena ny filohampirenena Andry Nirina Rajoelina sy ireo mpomba azy.
Avilivily amin » izany indray ny sain’ny vahoaka izay sahirana mafy noho ny vidim-piainana. Tao anatin’ny dimy taona nitondran’i Andry Rajoelina izay, nanomboka ny taona 2019 ka hatramin’ny taona 2025 izao dia tafakatra 100 % ny vidim-piainana. Ny vary tamin’ny taona 2019 dia 450 ariary ny kapoaka ka izao lasa 1200 ariary izao. Tena tsy nahomby ny tetika nentin’ny fanjakana hampandrosoana ny malagasy. Nidangana avokoa ny entana filana andavanandro. Santionany fotsiny ny vidim-bary io.
Ny fahantrana no nanjaka hatramin’izao ary nitombo andro aman’alina izany.
Na inona na inona fomba fanazavana dia sahirana ny vahoaka malagasy ary mijaly tanteraka ankoatran’ ireo ao anatin’ny fitondrana.
Mitaky fiovana maika avy ny fitondrana ny vahoaka nefa tsy hita taratra amin’ny fihetsikin’ny fitondrana izany.
Eo anatrehan’izany dia miaro ny sezany mafy ny fitondram-panjakana ka nanambara omaly ny filohampirenena Andry Rajoelina teny Iavoloha fa tsy handefitra amin’ny mpanakorontana izy. Nomeny baiko ny governora 23 isam-paritra handray andraikitra hoan’ireo izay heverina fa hanakorontana. Ny filohan’ny Antenimierandoholona ny jeneraly Richard Ravalomanana moa dia efa tsy hay intsony ny vava ataony amin’ny fampitahorana ireo tsy mitovy hevitra amin’ny fitondrana. Eto Antananarivo dia nampitandrina ireo izay hanao fihetsiketsehana koa ny préfet de police ny jeneraly Angelot Ravelonarivo fa tsy hilefitra koa hoan’ireo izay mikasa hanao izany.
Tsy misy resaka avoakan’ny ao amin’ny fitondrana ankevitriny raha tsy ny fampitahorana ireo izay mieritreritra hanao fihetsiketsehana na maneho hevitra masiatsiaka amin’ny tsy fandehanan’ny raharam-pirenena amin’izao fotoana izao.
Raha mihaino ny feon’ny vahoaka nefa dia tsy misy mieritreritra ny hanao fihetsiketsehana hanongampanjaka fa ny ady amin’ny fiainana izay tsy zaka intsony no mampimenomenona azy ireo. Mitady olona hitondra vaha olana izany ny vahoaka na inona na inona firehana politika misy azy. Ny mpanohitra koa anefa hita fa tsy manana hevitra ary ny mpitondra toa tapadalan-kaleha.