Politika: Tsy mitovy intsony ny fijerin’ny fanjakana sy ny vahoaka

Ny olana lehibe eo amin’ny firenena dia ny tsy fitoviam-pijery eo mpitondra fanjakana sy ny olona entina. Eto Madagasikara dia efa izany no iainana ankehitriny. Ny fitondrana milaza fa i Madagasikara tsy maintsy mandroso, ny vahoaka mahita fa tena tsy misy fandrosoana eto fa voamaika potika ny toe-karena. Potika avokoa ny lalana manerana ny firenena. Ny lalana vita tara na goudron teo aloha lasa nivadika lalan-tany. Ny vidim-piainana tena tsy zaka intsony ny fiakarany izay efa tafahoatra ny 100 %tao anatin’ny iray taona , nefa ny fanjakana milaza fa miakatra ny PIB na ny fariankarena eto amin’ny firenena. Lazaina koa fa miasa ny fitondrana nefa ny vahoaka tsy mahita ny vokatry ny asa ataon’ny mpitondra izany. Ny vahoaka mihamahantra andro aman’alina fa ny mpitondra tsy mahatsapa izany fa rehefa mizara vary tsinjo sy ny tosika fameno dia milaza fa mamaha olana amin’ny fahantrana io. Arakaraka ny fizarana azy ireny anefa no voa maika nampahantra ny vahoaka.
Santionany amin’ny tsy fitoviam-pijery eto amin’ny firenena ireo. Tena sahirana ny vahoaka malagasy amin’izao fotoana izao. Tsy mahatsapa izany ny mpitondra ary tsy manana vaha olana tena mahomby. Tsy mifampijaono intsony ny vahoaka sy ny fitondrana ankehitriny ka tena zava-doza no mety ho vokatr’izany ny aoriana ao.