Asan’ny fitsarana : Maro ireo mpitsara no tsy faly tamin’ny fitsabahan’i Andry Rajoelina

Maro no tsy faly tamin’ny fanamparam-pahefana nataon’ny filohampirenena Andry Rajoelina tamin’ny fitsabahany tamin’ny fanapahan-kevitra nampidirana am-ponja ny vadin’ny colonel Rakotomamonjy Patrick.
Tamin’ny Alahady faha 4 May 2025 teo dia nanambara ny filohampirenena Andry Nirina Rajoelina fa tsy mety ny fampidirana am-ponja ny vadin’io colonel io. Nangataka ny hamoahana izany izy. Ny alatsinainy manaraka an’io dia navoaka ny fonja ilay ramatoa.
Teo anatrehan’izany dia maro ny mpitsara no tsy faly tamin’ny fitsabahan’i Andry Rajoelina tamin’iny raharaha iny. Isan’izany ny mpitsara Rakotomahanina James izay nanao fanambarana fa tsy misy intsony izany ny fahaleovantenan’ny fitsarana izany hoy izy ny alakamisy teo. Nitsikera mafy iny fanapahan-kevitra namoaka ny fonja ilay ramatoa ity mpitsara ity.
Maro moa ny resaka nandeha tamin’iny raharaha iny izay be dia be ny mpitsikera. Tsy misy eran-tany ka sady mpitsara no mpanapa-kevitra ny filohampirenena. Any amin’ny firenena mpanao didy jadona no misy izany. Rehefa voafidy ho filoham-pirenena izany eto Madagasikara dia afaka manao izay tiany hatao. Tsy miasa intsony ny lalàna fa ny filohampirenena no mandidy mahatapaka amin’ny zavatra rehetra.
Tsy ny famoahana ny vadin’ny colonel izay tsy manan-tsiny no olana fa kosa ny fomba nataon’ny filoham-pirenena amin’ny famoahana azy.