Nivadika ho korontana iray goavana ny loza . Loza mbola mitohy. Tanora sy salama ireo niharam-boina. Avy eo tonga ny fahasahiranana, ny fanaintainana, ary farany… ny fahafatesana.
Mangina ny fitondrana. Fahanginana izay azo heverina ho endriky ny fanararaotam-pahefana. Tsy nisy fanambarana mitombina natao tamin’ny fampitam-baovao ofisialy. Tsy nisy fanazavana imasom-bahoaka momba ny vokatry ny fanadihadiana toxicologique nalefa tany Frantsa.
Mangiran-dratsy ny fahanginana.
Milaza ny governemanta fa nisy fitondrana poizina natao tamim-pikasana. Saingy tsy misy fanazavana mazava : inona marina ilay poizina ? Ahoana no nanaovana ny fanadihadiana ? Ary inona no fehin-kevitra ara-tsiansa ?
Vitsy ny fanambarana ofisialy, feno fepetra sy fitandremana, toa miafina sy misitery.
Milaza izy ireo fa poizina, nefa tsy milaza hoe inona, ahoana no nampidirana azy, na nahoana no nisehoan’ny loza.
Noho ny tsindry avy amin’ny haino aman-jery sy ny fanehoan-kevitra avy amin’ny vahoaka, dia nanomboka nihetsika ny fitondrana. Fa ny hetsika voalohany ve ? Ny fitoriana an’ireo olom-pirenena sasany noho ny filazana “tsaho” tao amin’ny tambajotra sosialy. Tetikady fampanginana, fa tsy famahana olana.
Nezahana afenina, ka lasa mipetraka ny fanontaniana lehibe hoe: Sao dia hadisoam-panjakana lehibe mihitsy ity nitranga ity ?
Tsy loza ara-tsakafo tsotra izao. Tsy tranga tsy nampoizina fotsiny.
Izao dia efa olana politika, ary mitaky valiny politika ihany koa.
Manan-jo hihaino sy hahalala ny havan’ireo maty. Manan-jo hangataka valin-teny mazava.
Izao no takin’ny maro, mazava tsara :
• Mangarahara avy hatrany momba ny vokatra azo tamin’ny fanaraha-maso, na teto an-toerana na tany ivelany
• Fanokafana komisiona tsy miankina, ahitana dokotera, mpahay lalàna, mpanao gazety ary solontenan’ny fianakaviana
• Filazana mivantana avy amin’ny Filoha : tsy fisaorana fotsiny, fa valin-teny manoloana ny fanontanian’ny vahoaka
• Fampiharana sazy avy hatrany, araka ny lalàna velona, amin’ireo tompon’andraikitra raha hita fa nisy tsy fetezana
Tsy ekena intsony ny fahanginana fa fanambanina sy manao tsinontsinona ny vahoaka Malagasy.
Lazao ny marina.
Aujourd'hui : 382